སྟོན་མཆོག་ཐུབ་པའི་དབང་པོ།
སྟོན་མཆོག་ཐུབ་པའི་དབང་པོ་ནི། མི་ཡི་ནུས་པ་རྩལ་འདོན་བྱས་ཏེ་དཀོན་མཆོག་གི་བཀོད་པ་ལས་བརྒལ་བའི་རྒྱལ་སྲས་ཤིག་རེད། ཁོང་གི་མཛད་པ་ཆེན་པོ་བཅུ་གཉིས་དང་། དེ་བཞིན་དུ་གང་ལ་གང་འདུལ་གྱིས་གདུལ་བྱ་རེ་རེའི་ཁམས་དང་བསམ་པ། དབང་པོ་དང་འཚམས་པར་ཆོས་ཀྱི་སྦྱིན་པ་བྱིན་པའི་པའི་ཚུལ་འཇིག་རྟེན་ཀུན་གྱི་ཡིད་དབང་འཕྲོག་པའི་གཏམ་བརྒྱུད་ངོ་མཚར་ཅན། གླེགས་བམ་བརྒྱ་ཕྲག་ཙམ་ཡོད་པ་དེ་དག་འདིར་འགོད་ཐབས་བྲལ། དེས་ན་འདིར་སངས་རྒྱས་ངོ་སྤྲོད་ཀྱི་ཚུལ་དུ་སྐད་ཆ་ཉུང་ཉུང་ཞིག་ཞུས་ན།
དེ་ཡང་སངས་རྒྱས་ནི་ང་ཚོ་འགྲོ་བ་སྤྱི་ལ་དབང་བའི་སྐྱེས་ཆེན་ཞིག་རེད། ཁོང་གིས་འབད་པ་ཆེན་པོས་ཉོན་མོངས་པའི་དཔུང་ཆེན་དེ་དག་རེ་རེ་བཞིན་བཅོམ་ནས། མཐར་སྤངས་རྟོགས་ཀྱི་ཡོན་ཏན་ཕུན་སུམ་ཚོགས་པ་རྒྱུད་ལ་ལྡན་པར་མཛད་པ་ཡིན་ཏེ། དེ་ཡང་ཁོང་ལ་ཕྱི་ནང་གི་འགལ་རྐྱེན་ཛ་དྲག་པོ་ཅི་འདྲ་ཞིག་འཕྲད་ནའང་། སེམས་ཉོན་མོངས་ཀྱི་དབང་དུ་ཤོར་མ་མྱོང་ལ། ངག་ནས་ཚིག་ངན་རྩུབ་པོ་ལན་གཅིག་ཀྱང་གསུངས་མ་མྱོང་། ད་དུང་ཁོང་གིས་ཕྲ་མ་འཁོན་སེམས་ནི་དེ་བས་གནང་མ་མྱོང་། ཁོང་གི་མཛད་པ་ཡོད་དོ་ཅོག་ནི་བྱམས་བརྩེ་ཤེས་རབ་ཡ་མ་བྲལ་བ་ལ་གཞི་བཅོལ་ཏེ་ལག་ལེན་གནང་བ་འབའ་ཞིག་ཡིན། ཁོང་ནི་ང་ཚོ་འགྲོ་བ་མི་ཡོངས་ཀྱི་མིག་དཔེ་ཞིག་ཡིན་ཏེ། དེ་ཡང་ཁོང་གིས་མ་རིག་ལྗན་ལྗིན་གྱི་སྣང་བ་ཐམས་ཅད་ཕར་ལ་བསལ་ཤུལ་ན། རང་རེའི་འགྲོ་བ་རྣམས་ཀྱི་གཞི་གཤིས་ཀྱི་མཛེས་སྡུག་མཐར་ཐུག་པ་འདི་ཡིན་ཞེས། བརྩེ་བ་དང་ཤེས་རབ་ཀྱི་རང་གཟུགས་ཅན་གྱི་མཚན་གཞི་ལ་བཞེངས་ཡོད།
ཁོང་གིས་སྐུ་ཚེ་ཧྲིལ་པོ་བྱམས་བརྩེ་ཤེས་རབ་ཟུང་འབྲེལ་གྱི་ལམ་ནས་དྲན་ཤེས་དང་བག་ཡོད། དེ་བཞིན་དུ་བཟོད་པ་དང་བསམ་གཏན་གྱི་ཉམས་ལེན་རྒྱུད་ལ་སྦྱར་ཏེ། གོམ་པ་རེ་རེ་དང་སྐར་ཆ་རེ་རེ་ཡང་རྣམ་གཡེང་དང་བག་མེད་ཀྱི་དབང་དུ་གཏན་ནས་ཤོར་མ་མྱོང་། སྐྱེས་ཆེན་དེ་ཉིད་ཀྱི་བྱམས་བརྩེ་དང་ཤེས་རབ་ཡ་མ་བྲལ་བའི་བཟང་སྤྱོད་དེས། འགྲོ་བ་མི་རིགས་སྤྱི་ལ་ཤེས་རབ་ཀྱི་འོད་སྣང་དང་ཞི་བདེའི་ལེགས་སྐྱེས་ཆེན་པོ་ཞིག་འཛ་གླིང་འདིར་བཞག་ནས་ཕེབས་སོང་། ཁོང་གི་བཀའ་དྲིན་ང་ཚོ་འགྲོ་བ་ཡོངས་ནས་བསབ་ཏུ་མེད་པར་ལྷགས་ཡོད།