ཁ་ནས་བཤད་པ་ཙམ་མ་ཡིན་པར་ལག་ལེན་གྱི་ལམ་ནས་བོད་ཀྱི་ཆོས་དང་རིག་གཞུང་ལ་ཞབས་ཏོག་བགྱི་སླད་དུ། ཐའེ་སྡོད་བོད་རིགས་རྣམས་ལ་ནང་ཆོས་དང་སྐད་ཡིག་འཆད་ཁྲིད་ཀྱི་ཞབས་ཞུ།
དེ་ཡང་བོད་མི་རིགས་ཀྱི་སྲོག་རྩ་ནི་བོད་ཀྱི་ཆོས་དང་རིག་གཞུང་ལ་ཐུག་ཡོད་པའི་དངོས་ཡོད་གནས་ཚུལ་ཡིད་ལ་བཅངས་ནས། ཐའེ་སྡོད་བོད་རིགས་ཚོགས་པ་དང་ཐའེ་ཝན་རྒྱལ་སྤྱི་བོད་བརྒྱུད་ནང་བསྟན་ཞིབ་འཇུག་ཚོགས་པ་གཉིས་ནས་ཐའེ་སྡོད་བོད་རིགས་རྣམས་ལ་ཆོས་དང་རིག་གཞུང་གི་ཞབས་ཏོག་གང་ལྕོགས་ཞུ་རྒྱུའི་ཐད་ལ་གྲོས་བསྡུར་བསམ་ཚུལ་ཡང་ཡང་གླེང་མཐར། ཐའེ་ཝན་རྒྱལ་སྤྱི་བོད་བརྒྱུད་ནང་བསྟན་ཞིབ་འཇུག་ཚོགས་པས་གཙོ་འགན་ཁུར་ཐོག ཐའེ་སྡོད་བོད་རིགས་ཆེད་དུ། ཀ་ཁ་ག་ང་། ཞེས་པའི་ཚོགས་ཁང་གསར་བ་ཞིག་ས་གནས་བོད་མི་རང་གི་ཆོས་དང་རིག་གཞུང་དང་འབྲེལ་བའི་བྱེད་སྒོ་སོགས་ཀྱི་ཆེད་གཏན་འཇགས་སུ་གླས་ཟིན་པར་མ་ཟད། གལ་ཆེའི་དུས་ཆེན་ཁག་ལ་ས་གནས་ཀྱི་བོད་པ་རྣམས་འདུ་འཛོམས་ཀྱིས་ཆོས་དང་རིག་གནས་ཀྱི་བྱེད་སྒོ་སྣ་ཚོགས་སྤེལ་དང་སྤེལ་མུས་དང་། ལྷག་པར་དུ་རིས་སུ་མ་ཆད་པའི་ཆོས་བརྒྱུད་ཁག་གི་དགེ་བའི་བཤེས་གཉེན་རྣམ་པས། ཀ་ཁ་ག་ངའི་ཚོགས་ཁང་དུ་བོད་རིགས་རྒན་རྒས་རྣམས་ལ་ནང་ཆོས་ངོ་སྤྲོད་དང་། བོད་རིགས་གཞོན་སྐྱེས་རྣམས་ལ་བོད་ཀྱི་སྐད་ཡིག་སློབ་ཁྲིད་བཅས་ཀྱི་ཞབས་ཏོག་ཅི་ལྕོགས་སུ་ཞུ་བཞིན་པའོ། །