རྒྱལ་བསྟན་དར་སྤེལ་གྱི་བགྲོ་གླེང་ཆེན་མོ།
རྒྱལ་བསྟན་དར་སྤེལ་གྱི་བགྲོ་གླེང་འདི་ནི། སྙིགས་མ་ལྔ་བདོ་བའི་དུས་འདིར་ཆོས་ལུགས་རིས་མེད་ཁ་ནས་བཤད་པ་ཙམ་མ་ཡིན་པར། དངོས་ཡོད་ལག་ལེན་གྱི་ལམ་ནས་སྤྱིར་སངས་རྒྱས་ཀྱི་བསྟན་པ་རིན་པོ་ཆེ་དང་། ཡང་སྒོས་སུ་བོད་བརྒྱུད་ནང་བསྟན་འདི་ཉིད་འཛམ་བུ་གླིང་པའི་མི་རྣམས་ཀྱི་སྤྱན་ལམ་དུ་མཇལ་ཐུབ་པའི་ཐབས་ལམ་ཐད། བོད་བརྒྱུད་ནང་བསྟན་གྱི་མཁན་སྤྲུལ་དགེ་བའི་བཤེས་གཉེན་བརྒྱ་ཕྲག་ལྷག་མཉམ་འཛོམས་ཀྱིས་བཀའ་བགྲོས་ལྷུག་པོར་མཛད་པའི་ལྡིངས་ཆ་ཞིག་ཡིན།
དེ་ཡང་རྒྱལ་བསྟན་དར་སྤེལ་གྱི་བགྲོ་གླེང་ཆེན་མོ་འདི་ནི། སྤྱིར་སངས་རྒྱས་ཀྱི་བསྟན་པ་དང་ཡང་སྒོས་སུ་བོད་བརྒྱུད་ནང་བསྟན་འདི་ཉིད་ཇི་ལྟར་འཛིན་སྐྱོང་སྤེལ་བའི་ཐད་ལ་ཐའེ་ཝན་རྒྱལ་སྤྱིའི་བོད་བརྒྱུད་ནང་བསྟན་མཐུན་ཚོགས་ཀྱི་ངོས་ནས་གོ་སྒྲིག་ཞུས་ཏེ། ཕྱི་ལོ་ཉིས་སྟོང་བཅུ་གཅིག་གི་ལོར་་བགྲོ་གླེང་འདི་དབུ་ཚུགས་ཤིང་། དེ་ནས་བཟུང་ད་བར་ཐའེ་ཝན་རྒྱལ་ས་ཐའེ་པེ་ལ་ལོ་ངོ་དགུ་ལ་ལོ་རེ་བཞིན་འཚོགས་ཟིན་པ་དང་། ད་ལྟ་བར་དུ་སྤྱིར་སངས་རྒྱས་ཀྱི་བསྟན་པ་སྤྱི་དང་། ལྷག་པར་དུ་བོད་བརྒྱུད་ནང་བསྟན་རིན་པོ་ཆེ་འདི་ཉིད་འཛམ་གླིང་ཕྱོགས་ཡོངས་ལ་ཇི་ལྟར་འཛིན་སྐྱོང་སྤེལ་གསུམ་གནང་བའི་ཚུལ་ལ་བགྲོ་གླེང་ཞུས་ཤིང་། ལོ་རེ་བཞིན་དུ། གལ་ཆེན་སྐུ་མགྲོན་རྣམ་པ་དང་། ཚོགས་ཞུགས་མཁན་སྤྲུལ་དགེ་བཤེས་དགེ་འདུན་འདུས་པ་བརྒྱ་ཕྲག་ཙམ་ལྷན་འཛོམས་ཀྱིས། རིས་སུ་མ་ཆད་པའི་ཆོས་བརྒྱུད་ཀྱི་སྐུ་ཚབས་གཏམ་བཤད་པ་རྣམས་ཀྱིས་གཏམ་བཤད་ཀྱིས་གླེང་བསླངས་ཏེ། དེ་ལ་དེར་འདུས་པའི་རིས་མེད་ཀྱི་དགེ་འདུན་པ་བྱིངས་ནས་ཉམས་མྱོང་དང་དགོངས་ཚུལ་བརྗེ་ལེན་གྱིས། སྤྱིར་སངས་རྒྱས་ཀྱི་བསྟན་པ་རིན་པོ་ཆེ་འདི་དང་། ཡང་སྒོས་སུ་བོད་བརྒྱུད་ནང་བསྟན་འདི་ཉིད་འཛིན་སྐྱོང་སྤེལ་བའི་མཛད་པ་ཇི་ལྟར་སྐྱོང་དགོས་མིན་དང་།