དེ་ཡང་(2021)འདི་ལོའི་ཕྱི་ཟླ་༡༢ ཚེས་༨ ཉིན། ཐའེ་ཝན་རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་ཚོགས་པའི་ནང་བསྟན་དར་སྤེལ་བགྲོ་གླེང་སྐབས་བཅུ་པ་ཐའེ་ཝན་དུ་འཚོགས་གཏན་ཁེལ་ཞིང་། ཚོགས་འདུ་ཧྲིལ་པོར་ཐའེ་ཝན་གནས་བཞུགས་བོད་བརྒྱུད་ནང་བསྟན་ཆོས་བརྒྱུད་རིས་མེད་ཀྱི་མཁན་སྤྲུལ་དགེ་བཤེས་དགེ་འདུན་པ་གང་མང་མཉམ་ཞུགས་གནང་རྒྱུ་དང་། དུས་དང་མཐུན་པའི་སྒོ་ནས་བོད་བརྒྱུད་ནང་བསྟན་འདི་ཉིད་ཀྱི་འཛིན་སྐྱོང་སྤེལ་གསུམ་བྱེད་སྟངས། དེ་བཞིན་ཐའེ་ཝན་གནས་བཞུགས་བོད་མི་དག་གི་ཆོས་དང་རིག་གཞུང་གོང་འཕེལ་གཏོང་ཐབས། ས་གནས་ཀྱི་གནས་བབ་དངོས་ལ་གཞིགས་པའི་བོད་བརྒྱུད་དགེ་འདུན་པའི་སྤྱོད་ལམ་དང་མཛད་འགན། ཁྲོམ་པ་རིག་པ་དང་འབྲེལ་བའི་ནང་ཆོས་འཆད་སྤེལ་གྱི་ཐབས་ལམ་སོགས་དང་འབྲེལ་བགྲོ་གླེང་ཟབ་རྒྱས་གནང་གཏན་ཁེལ་བར་མ་ཟད། ཉིན་དེར་ཞིབ་འཇུག་ཚོགས་པས་རྩོམ་སྒྲིག་ཞུས་པའི་གལ་ཆེ་བའི་ཕྱག་དེབ་དང་དྲ་རྒྱ་སོགས་འགའ་ཞིག་དབུ་འབྱེད་ཀྱི་མཛད་རིམ་སོགས་ཡོད་པར་མ་ཟད། མཛད་རིམ་ཧྲིལ་པོ་རྒྱལ་སྤྱིའི་ཐའེ་ཝན་བོད་བརྒྱུད་ནང་བསྟན་ཞིབ་འཇུག་ཚོགས་པའི་ངོ་དེབ་བརྒྱུད་ཐད་གཏོང་བྱས་པ་དེར་རྣམ་པ་ཚོས་གཟིགས་འཚལ།